Un dos problemas recorrentes no CEIP A Ponte nos últimos anos era/é o servizo de comedor. Este verán houbo unha nova licitación do contrato por parte da Xunta de Galicia, había posibilidades dalgún cambio da prestadora do servizo e no mes de setembro a adxudicataria volve ser SALA GRADÍN, a un prezo de 5,70 €/neno día (un aumento a aproximado 2 € en relación á adxudicación anterior) cunha duración de 2 anos máis 2 prorrogables.
En anos anteriores, unha das escusas reiteradas de SALA GRADÍN para non mellorar a calidade das comidas era o orzamento moi axustado ante unha situación de constante subida prezos.
Co nova adxudicación, cun aumento substancial do prezo agardábamos que a calidade da comida tamén fose substancialmente maior, pero visto que isto non acontecía, fomos trasladando as incidencias do servizo á Dirección do centro para que lle dese traslado á empresa ao ser a responsable do servizo.
Nas últimas semanas as queixas que nos trasladan as familias foron en aumento e solicitamos reunirnos persoalmente coas monitoras/es e coa xerencia de Sala Gradín encargadas do comedor.
A primeira das reunións celebrouse o 20/02/24 e a segunda o 14/03/24, nas dúas estaba presente a dirección do centro,e dende a ANPA trasladamos as queixas e reclamacións das familias sobre o funcionamento do servizo e as consideracións sobre os diversos incumprimentos do prego de contratación ao noso entender.
—————————————————————–
Podéndose resumir nos seguintes puntos:
1. CALIDADE DA COMIDA
O maior dos problemas é falta de calidade do produto polo que solicitamos:
- Un maior tamaño da porción dos alimentos ricos e proteínas (carne, peixe, ovo…) que permitan un aumento do valor nutricional.
- Aumentar os tamaños das racións a servir
- Utilización de diferentes técnicas para a elaboración dos pratos
- Menús mensuais acorde á tempada e equilibrados
- Variedade de alimentos con alto contido en nutrientes
- Especificar tipos de froita servida
Neste punto fixo tamén quixemos deixar claro de varias cuestións xerais:
- A temperatura da comida servida ten que ser óptima, non podendo suceder que estean frías.
- A importancia do sabor da comida é básico para a súa inxesta e hai que coidalo, non se pode permitir malos sabores como: a queimado ou simplemente inindentificables.
- A publicación na web do centro da :
– Programación mensual do menú cunha antelación mínima de 15 días
– Fichas técnicas dos pratos, sendo un anexo do meú mensual.
2. ORGANIZACIÓN DO SERVIZO
Trasladamos a sensación de falta de organización cando se presta o servizo, tanto dentro do propio comedor como na xestión do tempo de lecer, polo que fixemos as seguintes suxestións para tentar mellorar a organización:
- Para evitar que a comida enfrie, proponse servir en prato e non servir o 1º e o 2º á vez.
- Facilitarase o coitelo na 2° quenda de comedor e valorarase para 1° e 2° de primaria.
- Reparto da froita, asegúrase que a todo nena/o se lle dá unha peza de froita podendo escoller en cortada/dividida ou enteira.
Anteriormente a froita sobrante devolvíase á empresa, dende vai unhas semanas queda no cole para un uso posterior tanto no comedor como no recreo.
- Monitor responsable de grupo: para o mellor seguimento grupo por niveis determínase que cada monitor/a será o encargado do seu grupo acompañándoo cando estean comendo, cando xoguen e á saída.
Isto facilitará que a/o menor teña a un/ha monitor/a de referencia e que as familias poidamos consultar con esa persoa calquera incidencia que houbese no servizo.
3. COMUNICACIÓN
Obsérvanse que existe un problema de comunicación coas familias, para mellorala establécese a figura de monitor/a responsable de grupo para que exista unha comunicación bidireccional comedor/familia.
Tamén se propón unha máis e mellor comunicación xeral á comunidade usuaria do servizo ( a través de ABALAR) no caso de cambios de funcionamento ou organización do servizo.
Rematadas as reunións e dada a receptividade dalgunha das propostas por parte da Xerencia de Sala Gradín, temos algunha esperanza de que o servizo vaia mellorando no 3º trimestre. Agardemos a que non sexa flor dun día sendo conscientes de que a mellora do servizo vai levar aparellada unha constante supervisión, polo que se acordou ter unha comunicación fluída para facer o seguimento.
